Inolisimavunga Quebecimi. Atautsimik jâriKatillunga nolaukKugut Hebron, Labradorimut Kimutsikut. Sugusiutillunga ilonnatik Inuit aujatamât aullâKattalauttut iKalunniavimminut oganniaviminullu. Atâtaga ikajuKattalauttaga iKalunik salummasaitillugu siugaujaitillugulu. IKaluit pâllinut iliukKaKattalauttavut ilangani ullumi atautsimi 20-nik pâllinik tataiKattadluta, aijauniattilugit motavammut. Atâtaga iKaluluviniKattalauttuk. Pantialunga tatatsiasiaKattalauttuk iKalunut; KaKuttanut, aupalângajunut aupaluttanullu, aupalunningit kisimi aullaiKattadlugit. Anânaga panitseKattalauttuk KaKunninginik. Taikua taijaujut pitsik. Unuttualunik pitsiliuKattalauttuk aulaiKattadlugit kavamaup niuvigvinganut atautsik 10 cents-iutillugu.

1959-ami Inuit nogiaKalimmata Hebronimit Nainimut nolaukKugut tamânilu angutittâlaukKunga. Aujami Hebronimut utiKattalaukKugut iKalunniagiattudluta. Motavammi suliaKattet uKaniadlutik Hebroni Kaningiluadlaningani iKalunik aitsikatagvigigianga taimaimmat 1961-ami pigiasidluta OkKami iKalunniaKattanialidluta.

OkKak Kaninginilik 70-mailigalamik Nainiup tachâni; nainanillu sitondinik ingiggatausok motakkut. Tuvaituammat motavaillu tikituammata, July 1-imigalak aullâKattalaukKugut aullâsimanialidluta takKenik maggonik. Aujanâdlugu tupimmik illuKaKattavugut. Namminik tupiliuKattalaugaluattunga tupitsajaKaluKattagunnaimat pisiKattalikKugut sanagesimajunik. Aujaulauttuk sâtsiudluta OkKalialaukKugut. Uvallu angutigalu, atatautsik innivut maggolu ingutavuk, atautsilu innima iKalunniaKatinga.

Senanigalak tupiKaKattalaukKuk OkKami inuluviniKaKattadluni iKalunniajunik. Mânna ilangit nuluaKagunnaitut umiaKagatillu, ununningillu laisansiminik aullaisimalittuit. Taimaidlutik takpaungaKattagunnaitut. Aujaulauttuk atautsituinnamik tupiKalaukKuk, uvagutuinnait, taimaigaluattilugu tujummilautsimangilagut. Aullâvittini isumajâgutitsaKangilak, suliatsaKatsainnadlunilu. Ilangani kingomaKattagaluadluta ilattinik ikittukulogatta, taimaigaluattilugu utigumaKattangilanga. Isum atuppat sikukasânninganut aullâvimmiKattagaj Nainiup silatâni nunaKagiak aliagidlagakku, salumadlamat.

Ullâkut makiKattavunga fimfimi. Ullâsiutiliuge, ilakka tupâKattajakka. Ullâsiutitugetuagamik nulualiaKattajut paitillunga igadlunga, iKutuid pitsiliudlunga ubvalu tupimmik tuappingaidjât Ilangani utsuliliuKattavunga puijiup utsungani Oil-iKadlunga. Taimâk pigiamik sungiusimalik taimâllu pigiak piugimmagijaga. Puijiup utsun sunatuinnanut atuttausok, tâvatuak nutâtsajau utsuliliugiamut. Akutsianik putjusedlutit utsul atuinnagutiKattajait. Utsuk kikiatsajammut uki tittisiagikKâdlugu akutsiat iganialidlugu utsumi.

PuijisiuKattavugut aKumigokkut. Ilonnasiangit piKutingit piuliKattajakka. Kisinga ulumik atu' KisiligiKattajaga. KisiligikKâdlugu iKutuKattaj. ubvautialummik atudlunga, Artic Power-imikpiujullaget Kisinik iKutuigutigigiangit. Initsevi ilidlugu silami panitsinialidlugu. Kisinga piuju pualuliugiamut (silapigunik) Kamiliugiamullu. KajaliuKattalauttuk Kisijanik. KisiligikKâdlugu mikKuijadlugu mitsunialidlugu kilikittuagulautillugu.