Motavak tikigaimmat aullâsimavittinut ilattinik Nainimejunik tujuiKattavugut puijiviniluvininnik, piluattumik tujudlugit InutuKait. Tujotivut idlivinut sikulinnut iliKattajavut sujugasuangimut. Motavait uvattinik pajutsainajut sikunik/milanik. Tâvatuak ilangani onaKialigaimmat akuniungituk sikuvut auKattajut piKalujatsiugiaKanialidluta pejaigvigiKattadlugit iKalutta sujugekkutitsanginnik.

OkKaliagiak iKaluit tasinit anigajâlittilugit aliagitsuajaga. Tiningalimmat aulsagatsaluvinik, taimailigaimmatalu silakKijadluta aulsaKattavugut. Anginingit aulaigatsautillugit piuliKattajavut mikiningit pitsiliuKattadlugit. Ilangani unuttualommata motavak nigiunnatinnagu ilonnatik pitsiliuKattajakka.

Pitsiliugiamik ililaukKunga anânaganit mikijodlunga. Sauninga pedlugu niKijanga agguKattajavut panisagaigasuamut. IKaluk mikijoppat savimmut Kupittausok niaKunganit pigiasidlutit, sauninga petuinnadlugu panitsinialidlugu siKinigâjumi. Angijunik pitsiliugama nânga peKattajaga nânga utsomat. Sauningit pejakKâdlugit niKijanga aggudlugu salummasadlugit Kangattadlugit panitsinialidlugit siKinigâjumi. SiKinigâtsiamat anugitâdlunilu woggimi atautsimi panisot. Taimâtsainak pimmijut tuttuvinet puijivinellu, nikkuliuKattavunga puijivininni tuttuvininnilu. Tuttuvinimmik nikkuliugama nukin pejaKattajaga, taimâtsainalu puijiviuniup utsunga pejaKattamidlugu. NiKijanga sâttuagulautillugu aviukKaKattajaga. Ilangit idjunitsanik sanaKattajut, sâttunik sanaKattavunga panisagaigasuamut. Kijum~ Kangattadlugit mumiKattadlugit panitsiKattajakka. Ujagait Kânganut siammadlugit panitsijausongumm siKinigâttumi. kamagijautsainagialet igunasonguma kamagijautsianginamik. Nikkuit piujullaget nutaungitunikKâgatik. Nutâtsajaujojâsot takKinik sâtsinik ailangitumi nilatâttumegamik Kuatsevimmilonnet.

IKaluit tasinut utigaimmata panaigiasiKattavugut Nainimut utigiamut. Ilonnasiatik atusimajavut aujanâdlugu salummasagiaKaKattajavut, angiKautigiaKaKattagattigit. Ilonnatik nuluavut salummasadlugit ujagani panitsiKattajavut, panimn idlivinut iliukKaKattadlugit.

Nunak salummasaKattajavut. Ititsaliudluta sanet sauKattajavut utigutta nunajavut salumagasuamut. Annugâvut ilonnatik iKutuKattajakka ilonnatillu piKutivut atusimajavut salummasadlugit piuliukKadlugit. NiKijatsatinik katitsuiKattavugutangiKaKâgata - timmianik, tuttuvininnik, iKalunik. Salummasadlugit idlivinut pokKadlugit angiKautiKattajavut tikigatta Kuatsevimmoniadlugit.

Nainimut utisimaligatta nunivagiaKattavunga, uvilutsiugiaKattadlunga aulsaKattadlungalu ogâtsunik. Ogâtsuit ogaujâkasâttut. PitsiliuKattajakka. NiKijaKaKattavugut Kuatsevittini nâmmatunik upingasâmunut, upingasâmi aulsagialiaKiKattadluta sikukkut. Skidoo-kut aulsagiaKattavugut Nainiup kangidluanut aulsangugatta aKiggisiuKattadluta ubvalu puijisiudluta nillisiudlutalu.